أهواك يا حلة عمر
,,,,,,,,,,,,,,,,,,,,
اللقاء كان مُر ومُؤلم
والوداع كان الأمَر
والدموع من الجميع
علي الخدود حفرت حُفر
والكتير ما قادر إودٍع
لأنه ضاق مُر السفر
ليه يا دهر؟؟؟
عزفت في وتري الحزين
ونحنا في ساعة سمر
ردمت السنين فوق السنين
والغربة طالت
ونحنا لسه ما عارفين
متين وقت السفر
والخريف شتلاتو
نبتت في القلوب
وروتها زخات المطر
وإرتوت أرض الجفاف
وإمتلت كل الحُفر
والفرحة عمت ياسلام
وما مهم وقت السفر
كان العشم كل العشم
الأيام تطول قبل السفر
لكن دي الظروف
والريالات والألوف
تركتنا فوق كف القدر
وراكبين علي ظهر البحر
والذكريات الحلوة بينكم
كانت أحلي من ربيعكم
إن شاء الله يا حلة عمر
لا تشوفي ضايقة ولا كدر
إنت مهرك غالي خالص
تبري مجمر فوق حجر
إنت يا حلة عمر
حورية خالصة
أهواك يا أخت القمر
أهوي فيك كل ناسك
كبارك وصغارك
والشوارع والهكر
أهواك يا السيدة البتول
أهواك وأهوي فيك
كل مُداح الرسول
وأهوي فيك كل زول
حامد شكر
ومهما أكتب أو أقول
أهواك يا أم الفصول
كل أيامك ربيع
والخريف جاب المطر
والخريف جاب المطر.....
,,,,,,,,,,,,,,,,,,,,,,
حلة عمر هي قريتي الوادعة التي تنام بجوار (ترعة مشروع المناقل) كهمزة علي السطر. لها ولوطني الكبير السودان حبي وتقديري.